२०८१ कार्तिक ७, बुधबार
६६३ पाठक संख्या राजमणि बराल
सिमरा, २४ जेठः बाराको जीतपुरसिमरा उपमहागरपालिकाले सामुदायिक विद्यालयमा पढाउने बालविकास सहजकर्तालाई मन्टेश्वरी इसिडी तालिम सञ्चालन गरेको छ । हेटौँडा लिंकेज टेक्निकल एकेडेमी प्रा. लि हेटौडाको प्राविधिक सहायता तथा व्यवस्थापनमा उपमहानगरले पहिलो चरणमा ५ दिने तालिम बुधबारदेखि सिमरामा सञ्चालन गरेको हो ।
बालविकास सहजकर्ताहरुलाई शैक्षिक सामग्री निर्माण तथा प्रयोगसम्बन्धी तालिम तथा जानकारी दिन उपमहानगरले पहिलो चरणमा २१ जना बालविकास सहजकर्ता र दोस्रो चरणमा २१ जना गरी ४२ जना बाल विकास सहजकर्ता तथा तेस्रो चरणमा प्राथमिक तहमा स्थायी भई आएका नव प्रवेशी २० जना प्राथमिक शिक्षकलाई ५ दिने तालिम सञ्चालन गर्न लागेको हो ।
उपमहानगरको कुल लागत ३ लाख ५० हजार रुपियाँमा तालिम सम्पन्न गरिने लिंकेज टेक्निकल एकेडेमी प्रा. लि हेटौडाका अध्यक्ष भूपेन्द्र कोइरालाले जानकारी दिनुभयो ।तालिम कार्यक्रमको उद्घाटन जीतपुर सिमरा उपमहानगरका उपप्रमुख भोलाप्रसाद अधिकारीले गर्नुभएको थियो ।
कार्यक्रममा नगरका शिक्षा महाशाखा प्रमुख शिवजी प्रसाद, नेरा नमुना मा वि सिमराका प्रधानाध्यापक शंकरकुमार आचार्य, व्यवस्थापन समितिका अध्यक्ष गंगा वस्नेत लगायतको उपस्थिति रहेको थियो । तालिम प्रशिक्षण ट्रिजा सुब्बा र स्वस्तिका थापाले दिइरहनुभएको छ ।
