२०८१ मंसिर ७, शुक्रबार
४१४ पाठक संख्या सयपत्री समाचारदाता
सिमरा, १७ मंसिरः सिमरा विमानस्थलमा आइतबार हवाइ इन्धन रिफ्यूलिंग स्टेशनको उद्घाटन गरिएको छ । नेपाल आयल निगम लिमिटेडको आयोजनामा
नेपाल सरकारका उद्योग तथा आपूर्ति मन्त्री रमेश रिजालले उद्घाटन गर्नुभएको हो ।
उद्घटन कार्यक्रममा मन्त्री रिजालले पेट्रोलियम पदार्थको मूल्यलाई यथास्थितिमा राख्ने अवस्था नभएको बताउनुभएको थियो । रिजालले पेट्रोलियम पदार्थको मूल्य बढ्दा नबढाउने र मूल्य घट्दा घटाउने गरेकोले यो अवस्था लामो समय नटिक्ने बताउनुभएको हो । यसअघि आयल निगमले खाना पकाउने ग्याँसमा प्रतिसिलिन्डर २ सय रुपैयाँ वृद्धि गर्दा चौतर्फी विरोधपछि बढेको मूल्य फिर्ता लिएको थियो ।
यसैवीच उद्योगमन्त्री रिजालले आम जनताले उपभोग गर्ने ग्यास र औद्योगिक प्रयोजनका लागि प्रयोग हुने ग्यासको विषयमा मन्त्रालयमा छलफल भइरहेको बताउनुभयो । उहाँले जनताले उपभोग गर्ने ग्याँसको मूल्य मापदण्ड बनाएर कममा विक्री गर्न र उद्योग कलकारखानामा प्रयोग गरिने ग्याँसको मूल्यलाई व्यवस्थापन गर्न सकिने कुरामा ध्यान दिन निगमलाई आग्रह गर्नुभयो ।
निगमका कार्यकारी निर्देशन उमेशप्रसाद थानीले नेपाल आयल निगम व्यापारिक संस्था भएपनि राज्यको पूर्ण स्वामित्वको संस्था भएकोले सेवामूलक भएको बताउनुभयो । उहाँले सिमरा विमानस्थलमा हवाई इन्धनको रिफ्युलिङ्ग स्टेसनको काम तदारुकता साथ भएको र भरतपुर, सिमरा र जुम्ला विमानस्थलमा हवाई इन्धनको रिफ्युलिङ्ग स्टेसन राख्ने नीति तथा कार्यक्रममा पनि तय भैसकेको बताउनुभयो ।
कार्यक्रम जीतपुर सिमरा उपमहानगरका नगरप्रमुख राजन पौडेलले सिमरा विमानस्थलमा रिफ्युलिङ्ग स्टेसन राख्ने ३ महिनादेखिको प्रयास सफल भएको बताउनुभयो । पौडेलले सिमरा विमानस्थलका क्षेत्र विस्तारका लागि नापी लगायतका कुरामा सहकार्य गर्दै अघि बढेको बताउनुभयो ।
कार्यक्रममा नेपाल नागरिक उड्ययन प्राधिकरणका उपमहानिर्देशक प्रेमनाथ ठाकुरले विमानस्थलको क्षेत्रफल साँघुरो भएकाले बढाउनुपर्ने आवश्यकता रहेको औल्याउनुभएको थियो ।
कार्यक्रममा विभिन्न क्षेत्रका व्यक्तित्वहरुको उपस्थिति रहेको थियो ।
