२०८१ चैत्र २१, बिहिबार
१८७ पाठक संख्या सयपत्री समाचारदाता
सिमरा, ९ चैतः बाराको जीतपुरसिमरा उपमहानगरपालिकाद्वारा बजेट संशोधनका लागि आयोजित हिउँदे नगर सभाको बैठक सम्पन्न भएको छ ।
जीतपुरसिमरा उपमहानगरपालिकाको नगर सभा संचालन नियमावली, २०७५ को नियम १६ को उपनियम (२) बमोजिम बजेट पारित भएको घोषणा गर्दै एघारौ नगर सभाको बैठक शनिबार सम्पन्न भएको हो ।
जीतपुरसिमरा उपमहानगरपालिकाका नगर उपप्रमुख भोलाप्रसाद अधिकारीद्वारा प्रस्तुत आ.व. २०८१/०८२ को संशोधित बजेटमा चालु आ.व. २०८१/०८२ को लागि दशौ नगरसभाबाट आन्तरिक आय तर्फ १० करोड ३७ हजार, संघ र प्रदेशको समानीकरण अनुदानतर्फ १९ करोड २३ लाख ७५ हजार, राजस्व बाँडफाँडतर्फ १४ करोड ४७ लाख ९३ हजार र सशर्त अनुदानतर्फ ४० करोड ४४ लाख ७९ हजार, संघीय सम्पुरक अनुदानतर्फ ७ करोड ३० लाख गरी जम्मा रु.९१ करोड ८३ लाख ४७ हजार आम्दानी भई कुल अनुमानित गरिएकोमा चालु आ.व. २०८१/०८२ को फाल्गुण मसान्तसम्मको आम्दानी हेर्दा केही स्रोतगत आयमा फरक पर्ने देखिएको बताइएको छ ।
शनिबार सभामा पेश गरिएको संशोधित बजेटमा कुल बजेट एउटै भएता पनि वडाको कुल सिलिङ रु. १२ करोड १४ लाख ६ हजारबाट बढाई कुल रु. २७ करोड विनियोजन गरेको उपप्रमुख अधिकारीले जानकारी दिनुभयो । संशोधित बजेटमा प्रति वडा न्युनतम रु. ५६ लाख २५ हजार र वडागत जनसंख्या, भुगोल भौतिक पुर्वाधारको विकास र राजस्व संकलनलाई मुख्य सूचक मानी थप बजेट विनियोजन गरि पेश गरेको देखिन्छ । विनियोजनको क्रममा जनसंख्यालाई ३० प्रतिशत, भुगोलालाई २० प्रतिशत, भौतिक पुर्वाधारको विकासलाई २० प्रतिशत र राजस्व संकलनलाई ३० प्रतिशत भार तोकी आर्थिक सुशासनको पक्षलाई मध्यनजर गरि सिलिङ्ग कायम गरिएको बताइएको छ ।
जीतपुरसिमराका नगरप्रमुख राजन पौडेलको सभाध्यक्षतामा सम्पन्न नगरसभामा प्रमुख प्रशासकीय अधिकृत शान्तिराज प्रसाईँ, नगरसभा सदस्यहरु, कर्मचारी तथा सञ्चारकमीृको उपस्थिति रहेको थियो ।
