२०८१ चैत्र २४, आईतबार
१८३ पाठक संख्या
सयपत्री समाचारदाता
सिमरा,२३ चैतः नेपाल शिक्षक महासंघ राष्ट्रिय समितिले घोषणा गरेको आन्दोलनमा सहभागी हुन बाराका शिक्षक तथा कर्मचारी संघ संगठनले संयुक्त प्रेस विज्ञप्ति जारी गरेको छ । देशभरका शिक्षक कर्मचारीहरु चैत २० देखि प्रत्येक दिन बिहान ११ बजे देखि बेलुकाको ४ बजेसम्म उत्साहजनक सडक आन्दोलनमा रहेकाले बारा जिल्लाबाट पनि उत्साहजनक सहभागिता जनाउन आग्रह गर्दै प्रेस विज्ञप्ति जारी गरिएको हो ।
बारा जिल्लाबाट केही शिक्षक आन्दोलनमा रहेको तर कतिपय शिक्षक कर्मचारीहरुले घरको निजी काममा व्यस्त हुने,शैक्षिक भ्रमण तथा तालिम गोष्ठीहरुमा सहभागी हुने, विद्यालय खोलेर बस्ने गरेको सूचना प्राप्त भएको हुँदा यसप्रति नेपाल शिक्षक महासंघलगायत आवद्ध पेशागत संस्थाहरुको गम्भीर ध्यानाकर्षण भएको विज्ञप्तिमा जानाइएको छ ।
नेपाल शिक्षक संघ बाराका अध्यक्ष राजकिशोर सहनी, नेपाल राष्ट्रिय शिक्षक सङ्गठन बाराका अध्यक्ष बद्रीनरायण झा, एकीकृत अखिल नेपाल शिक्षक सङ्गठन बाराका अध्यक्ष रोशन यादव,राहत शिक्षक केन्द्रीय समितिका वरिष्ठ सहअध्यक्ष विनोद कुमार पासवान र नेपाल विद्यालय कर्मचारी परिषद बाराका देवकुमार साहद्वारा संयुक्त रुपमा हस्ताक्षरित विज्ञप्तिमा यस ऐतिहासिक आन्दोलनमा सहयोग र समर्थन गरिदिन हुन सम्पूर्ण अभिभावक, विद्यार्थी वर्ग, राजनीतिक दल तथा पत्रकार साथीहरुमा हार्दिक अनुरोध गर्दछौं भन्ने अपिल समेत गरिएको छ ।
हेर्नुहोस् विज्ञप्तिः
