२०८१ चैत्र २१, बिहिबार
१८९ पाठक संख्या सयपत्री समाचारदाता
सिमरा, १९ चैतः जीतपुरसिमरा गोल्डकपको १५औं संस्करण आगामी चैत्र २२ गतेदेखि सुरु हुने भएको छ । मोफसलको प्रतिष्ठित फूटबल प्रतियोगिताको रुपमा स्थापित जीतपुरसिमरा गोल्डकप हुन लागेको आयोजक नव जनजागृति युवा क्लबले मंगलबार आयोजित पत्रकार सम्मेलनमा जानकारी गराएको हो ।
प्रतियोगिता जीतपुरसिमरा उपमहानगरपालिका प्रमुख राजन पौडेलले उद्घाटन गर्नुहुने कार्यक्रम रहेको आयोजकले जानकारी दिएका छन् । प्रतियोगितामा ८ ओटा टिमले सहभागिता जनाउने छन् जसमा नेपाल पुलिस क्लब, मछिन्द्र फुटबल क्लब, फ्रेण्ड्स क्लब, हिमालयन शेर्पा क्लब, रिगल हेटौँडा रिसोर्ट एन्फा मकवानपुर, सलहेश युवा क्लब सिरहा, हनामी बि.एफ. सी भरतपुर र आयोजक नव जनजागृति युवा कल्ब रहेका छन् ।
प्रतियोगिताको विजेताले १० लाख र उपविजेताले पाँच लाख नगद प्राप्त गर्ने आयोजकले जनाएका छन् । चैत २९ गतेसम्म आयोजना हुने प्रतियोगिताको सर्वोत्कृष्ट खेलाडीले एक थान ई स्कुटर प्राप्त गर्ने आयोजक क्लबका अध्यक्ष रामचन्द्र लामाले जानकारी दिनुभयो ।
अध्यक्ष लामाका अनुसार विधागततर्फ उत्कृष्ट भएका खेलाडीले २५ हजार नगद प्राप्त गर्नेछन् ।प्रतियोगिताको उदयीमान खेलाडीले १५ हजार नगद हात पार्नेछन् भने प्लेयर अफ दि म्याचले १० हजार नगद पाउनेछन् । प्लेयर अफ दि म्याचको पुरस्कार ग्रीन इनर्जी नेपाल प्रा लिलेले प्रायोजन गर्ने भएको छ ।
जीतपुरसिमरा उपमहानगरपालिकाको मुख्य सहयोगमा हुने प्रतियोगितालाई सपोर्टर भिएक्सएल एजुकेशन सिमराका मोति नराल, सहप्रायोजक हुलास स्टिल, नेपोभिट, सूर्य नेपाल रहेका छन् ।
सगरमाथा इन्स्योरेन्स, युआर अटोमेटिक लण्ड्री, बुद्ध एयर, स्टार अस्पताल, सुसप्त मेडिकल, बोटलर्स नेपाल, होटल तथा पर्यटन व्यवसायी संघले सहयोग गर्नेछन् । यसैगरी राष्ट्रिय खेलकुद परिषद्, अखिल नेपाल फूटबल संघ, बारा जिल्ला फूटबल संघले प्रतियोगितालाई प्राविधिक सहयोग गर्ने महासचिव शम्भुसिंह ठकुरीले जानकारी दिनुभयो । चौरासी लाख ४५ हजार अनुमानित बजेट रहेको प्रतियोगिताका खेल हेर्न आउने विद्यार्थीलाई टिकटमा ५० प्रतिशत छुट र अपांगता तथा ७० वर्षमाथिका बृद्धबद्धालाई निःशुल्क प्रवेश गराईने महासचिव ठकुरीले जानकारी दिनुभयो ।
