२०८१ कार्तिक ७, बुधबार
४०४ पाठक संख्या सीता अधिकारी
डुमरवाना, २ पुसः प्रदेश २ कै उत्कृष्ट दुग्ध सहकारी डुमरवाना दुग्ध उत्पादक सहकारी संस्थाले आफ्नो २७ औँ वार्षिक सभा सम्पन्न गरेको छ ।संस्थाका अध्यक्ष टिकाराम न्यौपानेको अध्यक्षतामा भएको कार्यक्रमको प्रमुख अतिथि पूर्व कृषि मन्त्रि एवं बारा क्षेत्र नं ३ का प्रतिनिधि सभासदस्य ज्वालाकुमारी साह रहनुभएको थियो ।
२ हजार ५ सय २ जना सेयर सदस्य रहेको संस्थाले आर्थिक वर्ष २०७८/७९मा ८२ लाख २१ हजार चार सय मुनाफा गरेको संस्थाका अध्यक्ष न्यौपानेले आफ्नो प्रतिवेदन प्रस्तुतिमा उल्लेख गर्नुभएको थियो ।त्यस्तै संस्थाका लेखा संयोजक दीपक प्रसाद चौधरीले लेखा प्रतिवेदन प्रस्तुत गर्नुभएको थियो । संस्थाको नीति तथा कार्यक्रम प्रस्तुति संस्थाका व्यवस्थापक सन्तोष भुजेलले गर्नुभएको थियो ।
विभिन्न व्यक्ति सम्मानित
सहकारीले विभिन्न विधामा काम गर्ने ३६ जनालाई सम्मान तथा प्रशंसापत्र प्रदान गरेको छ । यसरी सम्मान प्राप्त गर्नेहरुमा उपकेन्द्र उत्कृष्ट किसान, सर्वोत्कृष्ट किसान र सर्वोत्कृष्ट कर्मचारी रहेका छन् ।
सञ्चारकर्मी पोख्रेल सम्मानित
सञ्चारका क्षेत्रबाट समाजमा चेतना फैलाउन भूमिका निर्वाह गरको भन्दै संस्थाले सञ्चारकर्मी शारदा पोखरेललाई सम्मान गरेको छ ।
कार्यक्रममा वडा नं १५ का वडाध्यक्ष रामप्रसाद लामिछाने, वडा नं १६ का वडाध्यक्ष हरिदेव खरेल, संस्थापक अध्यक्ष गंगादत्त अधिकारी, सप्तरंगी साकोसका अध्यक्ष राजु अधिकारी, सञ्चारकर्मी विदुर खड्कालगायतले मन्तव्य राख्नुभएको थियो ।
