२०८१ मंसिर १०, सोमबार
३४८ पाठक संख्या सिमरा, ४पुसः जिल्ला वन सुरक्षा समन्वय समिति बाराले राष्ट्रिय वन क्षेत्रमा पर्ने अतिक्रमित जमिनको सुरक्षाका लागि वृक्षारोपण गर्ने निणर्य गरेको छ । बुधबार बाराको कोल्हवी नगरपालिकाको वडा नं ५ मा रहेको ककडीको ३५ हेक्टर क्षेत्रफलको अतिक्रमित जग्गा र वडा नं २ स्थित अतिक्रमित १ सय १० विगाहा भूभागमा वृक्षारोपण गरी संरक्षण गर्ने निणर्य गरेको हो ।
बाराका प्रमुख जिल्ला अधिकारी एवं जिल्ला वन सुरक्षा समन्वय समितिका संयोजक नवराज सापकोटाले अतिक्रमित जमिनको अनुगमन तथा अवलोकन गर्दै छिटै वृक्षारोपण गरी जमिन संरक्षण गरिने बताउनुभयो । त्यस्तै डिभिजन वन कार्यालय बाराका प्रमुख विनोद सिंहले वन क्षेत्रको जग्गामा अहिले तोरी, गहुँलगायत विभिन्न बाली स्थानीयले लगाएपनि त्यसलाई हटाएर वृक्षारोपण गरिने जानकारी दिनुभयो ।
अनुगमनमा कोल्हवी नगरपालिकाका उपप्रमुख लक्ष्मी चौधरी, डिभिजन वन कार्यलय र मातहतका कार्यलयका प्रमुखहरु, सुरक्षा निकायका प्रमुख तथा सुरक्षाकर्मीलगायत सञ्चारकर्मीहरुको उपस्थिति रहेको थियो ।
