२०८२ पौष ४, शुक्रबार
२१९ पाठक संख्या सयपत्री समाचारदाता
सिमरा, ३ पुसः बाराको क्षेत्र नं ३ बाट संघीय सांसदको उम्मेदवारमा अग्रज पत्रकार भोजराज भट्टराई सिफारिसमा पर्नुभएको छ । लामो समय पत्रकारिता गरेर आम जनतामा लोकप्रिय बनेका भट्टराई नेपाली कांग्रेस बारा क्षेत्र नम्बर ३ बाट प्रतिनिधिसभा सदस्यको लागि उम्मेदवारमा सिफारिस हुनुभएको हो ।
उम्मेदवारको सिफारिस भएपछि झोला र डायरी बोकेर आम जनताको घरदैलोमा पुगी मन जित्ने प्रयासमा लाग्नुभएको छ । जीतपुर सिमराको वडा नं १५ डुमरवानामा बसोबास गर्ने भट्टराई काँगे्रसका अनुभवी नेता हुनुहुन्छ । गलामा गम्छा भिरेर झोला बोकी जनताको समस्या बुझ्दै गाउँघरमा डुल्न थाल्नुभएको छ ।
नेपाली कांग्रेस बारा क्षेत्र नम्बर ३ को कलैयामा सम्पन्न क्षेत्रीय भेलाले फागुन २१ मा हुने प्रतिनिधि सभा निर्वाचनका लागि प्रत्यक्षतर्फ उम्मेदवारको रुपमा भट्टराईको नाम सिफारिस गरेको हो । भट्टराईसहित क्षेत्रीय समितिले १० जनाको नाम सिफारिस गरेको छ । नेपाली कांग्रेसको क्षेत्रीय बैठकबाट भट्टराईको चौथो नम्बरमा नाम प्रतिनिधिसभा उम्मेदवारका रूपमा सिफारिस गरिएको जनाइएको छ ।
